邊個話大嶼山只可以一日遊?

March 20, 2017

放假唔想宅係屋企,又唔想hea行商場?等小編幫你度返個「兩日一夜玩轉大嶼山郊遊樂」行程啦!近排小編Facebook 愈來愈多朋友變身「山系少男少女」,周末都會約埋朋友去行山!所以今次誠意推介大家去大嶼山短玩兩日一夜。唔好嘘住,小編並非只係推介拜大佛、食齋菜依類入門級行程,有無諗過去大嶼山追星、睇日出?

 

其實大嶼山點止一日遊咁簡單,早排小編就約埋班攝影發燒友去大嶼山昂坪營地露營,順便影吓星星、日出。大嶼山昂坪營地算係入門級營地,就算露營新手都絕對handle到。首先,交通非常方便,只要搭港鐵係東涌站落車,然後搭23號大嶼山巴士係昂坪巴士總站落車,跟住指示牌沿《心經簡林》方向行,去到分岔口,記得左轉係去昂坪營地,右邊係去《心經簡林》,唔好轉錯。行多十幾分鐘就會到昂坪營地入口。

 

另一個適合露營新手嘅原因,就係配套設施足夠。昂坪營地有13個營位,每個營位置都有爐頭、6人石枱同石櫈,適合一大班朋友去玩 。最重要係營地入口附近有一個公眾廁所,方便清潔用具。

唔好以為露營只係煮吓嘢食好悶,小編都有心水行程推介。首選當然係要上鳳凰山睇日出!由起步到成功攻頂,路程大約1個半小時,不過行山新手就要預留多少少時間,因為鳳凰徑一啲都唔易行。其中鳳凰徑第3段最具挑戰性,因為依段路又稱為「天梯」,全程只有好短平路,其餘都係石級!小編當日就係同朋友半夜摸黑上路,每行十幾分鐘就停一停抖一抖,而且全程都非常黑,所以大家一定記得要帶電筒!

 

小編全程都無乜氣同朋友傾計,只係一路聽住Supper Moment嘅〈無盡〉,歌詞真係非常應景:「踏上這無盡旅途,過去飄散消散失散花火,重燃起重燃點起鼓舞……」

 

聽住歌感受周圍一片漆黑,眼前只有電筒嘅光,同埋山下一點點金黃色、由各家各戶散發出嚟嘅燈光。依晚天空好清,無乜雲,一抬頭就見到滿天星星,平日係市區根本無可能見到,就好似黑色布上灑滿銀色閃粉一樣。依個moment真係覺得成個人靜咗落嚟,每日返工嘅壓力好似突然紓緩咗。個一刻先發覺,自己平日就好似條橡筋一樣,不停拉、愈拉愈緊,但從來無畀自己好好放鬆吓。

 

大約凌晨4點幾,我哋一班人終於登上山頂。果度有一個好細好細嘅平地,聚集咗十幾位行山友同攝影發燒友。如果太大風,可以匿埋係避風亭等日出。當日好彩唔太大霧,雲先慢慢染紅,然後太陽慢慢升起一片金黃色超靚!橙黃色嘅太陽加上周圍連綿山脈、蔚藍色嘅海,真係好似Wallpaper一樣!

 

睇完日出,返營地執返行裝,食少少麵包就可以起行,去昂坪市集。市集沿途有幾個立體佈景畀遊客影3D相,個人覺得瀑布畫得幾似。

去大嶼山好多人都會去寶蓮禪寺齋堂食齋,相信都唔使小編多加介紹,不過小小溫馨提示,食完記得留返張齋票收據,可免費去大佛睇舍利子。除咗齋,小編另有心水小食推介,就係山水豆腐花!昂坪村總共有3間豆腐花店,每間都自稱用山水製造。小編就最鍾意食「龍輝山水豆腐花」。依間鋪係一間鐵皮屋,不過唔會好熱,有山邊涼風吹埋黎。唔知係唔係因為山水,佢啲豆腐花特別滑,仲帶出豆香。我朋友就叫咗碗芝麻糊溝豆腐花,佢話芝麻糊都非常正,加埋一齊食口感又綿又滑,仲有少少幼細沙粒一樣嘅芝麻!大家都食唔停口。

 

食飽就起行,行完山嘅小編見到大佛條樓梯就有啲腳軟,小腿肌肉又痛又冇力, ,所以唯有慢慢行啦。係大佛兜咗一個圈睇風景之後,蓮花底座有一個入口,可以入去睇舍利子。記得!參觀舍利子時係唔可以拍攝,大家都要守規矩以示尊重呀!

 

兩日一夜行程都差唔多完結,一班朋友都攰到散晒。果日下晝返到屋企,小編對腳真係攰到好似唔係自己咁。小編畀屋企練開跑嘅細佬係咁笑體能差,少做運動。佢見我不停摙小腿,佢就拋咗塊鎮痛貼畀我,沖完涼貼,又真係舒服好多!

 

如果平時朝9晚5坐辦公室,又少做運動,行完大佛嘅你小腿可能會酸軟到連企起身去斟杯水飲都唔想行,記得記得帶埋虎標鎮痛藥布(溫感)去呀!細塊藥布適用於範圍較小如小腿或關節位,有助血液循環,紓緩肌肉勞損!

 

最後提提大家,做個有公德心嘅「露營友」,千祈唔好破壞大自然,記得自己垃圾自己帶走!

Please reload

February 3, 2017

Please reload

Featured Posts

Follow us

  • Facebook - White Circle
  • YouTube - White Circle

版權所有© 2016 - 2017. 虎豹企業有限公司