新春行大運-紫羅蘭山

January 19, 2017

就黎農曆新年,除左拜年之外,大家安排左其他節目未? 其實除左行街睇戲,大家不妨考慮下行山,黎個新春行大運啦。

 

今次介紹嘅係每逢新年都幾多人去嘅地方: 紫羅蘭山,因為可以睇到吊鐘花。吊鐘花一般係1月下旬至2月上旬時盛開,佢嘅特別之處係每朵花好似指頭咁大,呈鐘狀,花瓣為五裂片,外緣微微外捲。要係香港欣賞到吊鐘花,仲有呢D地方: 大枕蓋、鹿湖、青龍頭,但以紫羅蘭山較近市區及易去,而且由紫羅蘭山山顛走過山坳後,更可從高處下瞰北坡的吊鐘花叢。

 

 

紫羅蘭山交通及路線

紫羅蘭山位於香港島的大潭郊野公園,去紫羅蘭山要由黃泥涌水塘公園出發。以下兩條巴士路線可到黃泥涌水塘公園:

  • 6 號 - 中環 (交易廣場)至赤柱監獄 (黃泥涌水塘公園下車)

  • 76 號 - 銅鑼灣 (摩頓台)至石排灣 (黃泥涌水塘公園下車)

黃泥涌水塘公園落車嘅位置有個油站,而油站側邊就有條樓梯上去,之後沿馬路向上行就會去到黃泥涌水塘公園 (如下圖示)。

 

 

遊覽紫羅蘭山基本上有以下呢3條步行路線:

  1. 黃泥涌水塘 à 衛奕信徑(鴻燊段) à 紫羅蘭山 à (行回頭路) 衛奕信徑(鴻燊段) à 黃泥涌水塘,需時約2個鐘,最易行。

  2. 黃泥涌水塘 à 衛奕信徑(鴻燊段) à 紫羅蘭山 à 淺水灣坳紫崗橋 à 大潭篤水塘,需時約4個鐘,中度辛苦。

  3. 黃泥涌水塘 à 衛奕信徑(鴻燊段) à 紫羅蘭山 à 淺水灣坳紫崗橋 à 赤柱峽道 (經孖崗山),需時約5個鐘,最辛苦。

 

當日我地就選擇以大潭篤水塘為終點。

 

詳細路線及難度

由黃泥涌水塘公園出發,沿馬路上山,再經過發電站,就會去到

衛奕信徑(鴻燊段)。上紫羅蘭山嘅路程由呢度正式開始。

 

A) 第一段路程: 衛奕信徑(鴻燊段)至指示牌 (需時約1個鐘)

由路程開始到以下指示牌,難度唔高,主要係樓梯及沙地為主,尚算平坦。

 

B) 第二段路程: 指示牌至紫羅蘭山最高點 (需時約30分鐘)

之後由指示牌行去淺水灣坳方向呢段路,開始有好多凹凸不平嘅石路,要特別小心隻腳拗柴。

 

經過無數嘅石路後,你就會到達紫羅蘭山嘅最高點。

最高點係一條窄窄繞住山邊行嘅路,所以要特別小心,以免墮崖發生意外。

 

到達紫羅蘭山嘅最高點後,你可以選擇回頭行返原路離開,又或者繼續向前行到淺水灣坳紫崗橋,再到大潭篤水塘或者赤柱峽道。

 

如果你選擇繼續向前行,要留意日落時間,,因為由紫崗橋至大潭篤水塘這段路程,係很崎嶇嘅林木通道,日落後天色陰暗,容易發生意外。

 

C) 第三段路程: 由羅蘭山最高點至淺水灣坳紫崗橋 (需時約1個鐘)

 

由紫羅蘭山去淺水灣坳紫崗橋同上山差唔多,都係以樓梯、沙地、石地為主,而且因為落山,難度唔算高。

 

D) 第四段路程: 由紫崗橋至大潭篤水塘 (需時約1個鐘)

 

直至去到紫崗橋,真正嘅考驗先來臨。

由淺水灣坳紫崗橋到大潭篤水塘呢段路係成個路程最艱辛嘅,因為全程都係超窄、超崎嶇嘅石路,仲要係行緊一條已經乾涸嘅河道。如果大家諗住行呢條路,最好著定對舒服D嘅波鞋或者行山鞋,避免拗柴。另外,要加緊腳步,避免日落後天色陰暗,視線不佳。

之後由大潭篤水塘行去大潭道,就可以搭巴士或小巴離開。

 

沿途景色

由黃泥涌水塘公園到大潭篤水塘,沿途有以下景色:

 

1) 黃泥涌水塘公園水上單車

即使唔行山,都可以黎呢度玩水上單車,係唔錯嘅活動。

2)遠望陽明山莊

由衛奕信徑(鴻燊段)開始行大約30分鐘,你會發現左邊有條小路,行出去可以遠望陽明山莊一帶嘅景色。係紫羅蘭山可以遠眺大潭篤水塘,而最高點更加係全個路程最靚嘅位置,好多人會係度影相。不過我地去嗰日天空比較多煙霞,唔太清,有少少失望。

3)遠望大潭篤水塘

係紫羅蘭山可以遠眺大潭篤水塘,而最高點更加係全個路程最靚嘅位置,好多人會係度影相。不過我地去嗰日天空比較多煙霞,唔太清,有少少失望。

4) 野生植物

行紫羅蘭山其中一個最主要嘅目的就係睇吊鐘花。我地係紫羅蘭山山頂見到佢地。

 

<吊鐘花>

 <吊鐘花>

 

由紫羅蘭山行落紫崗橋途中,仲有芒草同大頭茶。唔好以為只係得大東山先有靚芒草,其實呢度都有。

<芒草>

<大頭茶>

 

5) 遠望淺水灣

行落紫崗橋途中,係右手邊可以睇到淺水灣景色。

6) 大潭篤水塘日落
就啱時間,仲可以係大潭篤水塘欣賞埋日落。

-------------------------------------------------------------------------

溫馨提示:

行山行得多,少不免會扭傷、拉傷、肌肉疲勞,呢個時候虎標鎮痛藥布(清涼)就係出動嘅時候。

產品詳情: http://www.tigerbalmhk.com/tigerbalmplaster

 

 

 

 

 

 

 

 

 

 

 

 

 

 

 

 

 

 

 

 

 

Please reload

February 3, 2017

Please reload

Featured Posts

Follow us

  • Facebook - White Circle
  • Instagram - White Circle
  • YouTube - White Circle

版權所有© 2019 虎豹企業有限公司