出走日本15天 - 第三篇

December 15, 2016

從名古屋出發到白川鄉同埋立山黑部、黑部峽谷等地,話咁快已經黎到行程嘅第六日。

 

想重温我地之前嘅介紹,可以按以下網址睇返:

出走日本15天第一篇

出走日本15天第二篇 

黎到第六日,我地正式同中部同埋北陸講拜拜,向京都出發。由名古屋出發至京都好容易,只要搭<東海道、山陽新幹線>就可直達,車程大約一個鐘。

第六日至十日嘅遊覽地點:

 

黎到京都大約係朝早9:00,放低左行李係酒店後,我地就立刻出發去第一個景點: 嵯峨嵐山。

 

嵯峨嵐山 (第6日)

嵯峨嵐山其中一個最出名嘅就係嵯峨野觀光鐵道(嵐山小火車)。火車只得五個車廂,每日只有8班,所以D車飛好爆,要買呢條鐵路嘅車飛,第一日到達日本時就要買定。我地就喺中部國際機場嘅Central Japan Travel Center買,只係可以買到由龜岡到嵐山一程嘅車飛,其他都爆晒。

 

呢條觀光鐵道得四個站: 龜岡站、嵐山站、保津峽站、嵯峨站

由京都去觀光鐵道龜岡站,可以搭JR山陰本線係馬崛站落車然後步行過去。係龜岡站出面仲可以俾錢坐馬車遊覽龜岡,幾特別。

 

由龜岡到嵐山,車程大約20分鐘。其實我地有D唔好彩,雖然我地去嗰時仲係紅葉期,但唔係最茂盛嘅時期,始終茂盛嘅紅葉期好短,所以要睇大家彩數了。另外,因為火車行嘅速度幾快,唔係好影到D紅葉相,所以值唔值得搭就見仁見智,但個人覺得如果搭的話一程單程就夠,唔使搭來回。

 

抵達嵐山站後,向渡月橋方向步行,你會經過壯觀嘅竹林。

 

之後經過天龍寺,都係出名睇紅葉嘅地方,但個人覺得之前去嘅白鳥庭園靚D,另外入去天龍寺每人要付500日元,所以值唔值得入去都係留待大家決定。

 另外,亦會經過一D賣手作嘅攤檔。

個人覺得最特別係有個賣手繪畫嘅攤檔,佢D畫好靚,大家可以諗下買黎當明信片。

一路行去渡月橋方向,最吸引我地嘅就係嵐山手信街。成條街超多野食,啱晒極度饑餓嘅我地。

為食嘅我地立即食左四色雪糕,佢同時有四種味: 香草、抹茶、焙茶和栗子。雪糕又香又濃又細滑。

我地仲食咗下圖兩種小食! 好食,值得推介! 兩款都係以豆腐造嘅美食。

<湯葉湯>

湯葉即係豆腐皮,D湯好香好甜,豆腐皮好滑。

 <豆腐衣奶酪>

豆腐衣奶酪即係炸芝士豆腐,超香超好食,絕對係必食。

成條街仲有好多手信可以買。

我買左呢個純米吟釀酒俾我阿爸。

一個得意嘅月份擺設俾我阿媽。

沿呢條手信街一路行就會到達渡月橋,去到渡月橋就完成左我地嵯峨嵐山嘅遊覽。

遊覽完嵯峨嵐山區後,已經係差唔多5:00 p.m,所以我地差唔多要出發去夜遊清水寺,因為清水寺嘅夜間開放時段係5:30 p.m – 9:00p.m。

 

夜遊清水寺

清水寺係京都必遊嘅地方,因為據最近的新聞提及,清水寺會由2017年春天開始裝修,預計2020年東京奧運開幕前先開返,所以大家要把握時機!

 

其實日間嘅清水寺又係另一個景色,但因為我地日間時間緊迫,而且夜遊清水寺係紅葉期間先有嘅活動,所以最後選擇左只去夜間。如果大家夠時間,可以去晒日間同埋夜間。

 

由嵐山到清水寺,只要搭<京福電氣鐵道>由嵐山站出發到四條大宮站,轉巴士207號係清水道落車,再步行過去,時間大約要個半鐘。

 

同之前夜遊兼六園相比,清水寺嘅氣氛更好,因為熱鬧好多,你會感受到夜遊清水寺係日本人嘅城中盛事。

 

係清水寺入面,燈光射落紅葉到,令到D紅葉份外鮮紅,好靚。

另外,下圖呢個係成個清水寺嘅地標,呢個角度影埋紅葉+地標嘅景象,你可能係好多宣傳單張見過! 但下圖呢張相係我地影嘅,百分百原創。

另外,由巴士站去清水寺嗰段路有好多賣手信同小食嘅舖頭。平時大約8:00 p.m 就會關舖,但清水寺夜間開放期間,佢地都會延長營業時間至大約9:30 p.m。

 

祗園+八坂神社 (第7日) 

前一晚遊覽完渡月橋、清水寺等地,呢日我地訓到好晏,差唔多12:00 p.m先出發去祗園、八坂神社。

 

祗園唔需要我多介紹,大家應該都知呢條係出晒名嘅手信街,有好多好吸引嘅綠茶手信。去祗園只要搭巴士100 或206 即可,係JR京都站出面就有巴士總站。

沿祗園條手信街一路行,就可以到達另一景點: 八坂神社。我地去嗰日八坂神社好熱鬧,因為有個市集係到。係呢個市集裡面,最正係我地可以食到超大條超好食嘅蟹棒。

係八坂神社,可以寫下許願牌,我祈求中六合彩唔使返工,哈! 嗰日我地撞正有人舉行緊婚禮,日式婚禮真係第一次睇。

我地係祗園同埋八坂神社留到大約6:00 p.m,我地就返去酒店攞行李出發去奈良留宿。

 

奈良公園 (第8日)

係京都呢邊,另一個我地都幾期待嘅地方就係奈良公園。由京都去奈良,大約需時一個鐘。交通方面可以搭JR線或近鐵奈良線,但個人建議搭近鐵奈良線,因為近鐵奈良站較近奈良公園。

黎到奈良公園,當然係睇紅葉同埋親親奈良鹿。我地去嗰日撞正落大雨,都幾掃興,但好彩都見到好多奈良鹿,無因為落雨而見佢地唔到。另外,係咁多個紅葉景點中,我地覺得奈良公園最多最茂盛。如果有陽光,應該係超靚。

遊覽完奈良,我地就返酒店攞行李出發去東京河口湖睇富士山。去河口湖前,我地會係東京新大久保附近留宿一晚,之後第二日先一早出發到河口湖。

 

東京河口湖 (第9日+第10日)

由京都去東京各地區,只要搭東海道、山陽新幹線到品川,再轉JR山手線即可,而我地就係新大久保站落車。要提一提大家東海道、山陽新幹線張飛已經包埋山手線,所以記住係品川轉車時,你係唔使再買飛,係新幹線品川站出閘時記住攞返張飛,之後去山手線入閘時入返同一張飛即可。

第二朝出發去河口湖,首先要去JR山手線新宿站,之後轉JR中央線特急到大月,再轉富士急行線到河口湖站落車。由新宿到河口湖站差不多要2個鐘,之後再由站行約15分鐘到河口湖。

係河口湖,你可以選擇坐佢地嘅觀光船遊覽和遠眺富士山。

另外,附近有個天上山公園,嗰度有個展望台,可以從高處遠望富士山嘅景色。

 

係河口湖,我地係一間叫風之露台KUKUNA (http://kukuna.jp/) 嘅酒店留宿,沿河口湖行去大約20分鐘。佢最特別嘅地方就係有一個私人露天風呂係對住富士山,浸住浴望住富士山,超正,哈!

感受完富士山嘅壯觀景色後,我地就返去東京繼續餘下嘅旅程。

 

呢個時間,正式進入我地最後五天嘅行程! 係第四篇 (最後一篇),我地會同大家講下東京築地市場、有趣貓頭鷹café、大阪環球影城、箕面公園、黑門市場、心齋橋等地,密切留意!

 

去到呢到,你可能有一個疑問,點解成個行程唔係東京>名古屋>大阪+京都。原因好簡單:

 

我地係訂左名古屋入,大阪走嘅15日來回機票連4日酒店套票,東京係加入去嘅行程。當然你可以睇下有冇東京入,大阪走嘅來回票套票。所以我地只可選擇名古屋>東京>京都+奈良>大阪或名古屋>京都+奈良>東京>大阪。

 

計劃行程時,我地要諗埋各區嘅紅葉期。以我地為例,我地成個行程係11月4號至20號,越接近20號,京都大阪等地越大機會過哂紅葉期,所以計劃行程時,我地都盡量排哂D最有機會睇到紅葉嘅地方行先,所以去左京都奈良等地先再去東京,因為河口湖只會睇到雪景,唔大機會睇到紅葉。雖然我地咁樣會浪費左D時間,但成個行程可以睇晒紅葉同埋雪景。

 

<以上所有資料只供參考>

------------------------------------------------------------------

溫馨提示:

旅行雖然開心,但要玩得盡興,你就會行無數嘅路,仲要成日孭住個背囊、腳架、相機,返到酒店會覺得隻腳痛到唔係自己,仲會周身痛。虎標萬金油(紅色) 係呢個時候就可以發揮佢嘅作用。佢蘊含肉桂油,帶來溫熱感,有效紓緩肌肉疼痛和勞損扭傷。

 

 

 

 

 

 

Please reload

February 3, 2017

Please reload

Featured Posts

Follow us

  • Facebook - White Circle
  • YouTube - White Circle

版權所有© 2016 - 2017. 虎豹企業有限公司