出走日本15天 – 第一篇

November 25, 2016

休息係為咗走更長嘅路,及時行樂先係人生嘅大道理﹗適逢紅葉季節,今次就決定去日本走番轉,幫自己叉叉電﹗

 

難得出走15天,今次一定要盡情放空,去多d地方! 所以行程都相當緊湊.。

 

大致路線係咁樣: 名古屋 > 白川鄉 > 金澤 > 富山 > 立山黑部 > 名古屋 > 京都 > 奈良 > 富士山 > 東京 > 大阪。

 

今次一連四篇會同大家講下成個旅程嘅重點推介和要留意嘅地方。

 

第一日: 名古屋站

雖然好鍾意日本,但對佢嘅機場真係印象麻麻﹗由過關到攞行李,足足等成個半鐘,等到吽咗﹗攞完行李之後,一切就由買車飛開始。我地首先到一間叫Central Japan Travel Center 到買哂所有新幹線和嵯峨野小火車嘅飛。

 

新幹線係去D好遠地方嘅交通工具。好似我地今個行程咁,名古屋去金澤、名古屋去京都、奈良去東京、東京去大阪都要坐新幹線。所以一早買哂D時間可以預得好D。要留意新幹線可以買指定時間或者自由時間,個人建議如果想靈活性大D,最好買自由時間,因為即使走左一班車都仲可以坐另一班。但如果班次較疏及超長途個D,例如來回東京至大阪個段,最好買指定時間,因為佢地有機會無位。

 

另一個係度買嘅係嵯峨野小火車飛。呢個係京都其中一個出名景點,之後其他文章再詳細介紹。但要提一提大家,訂飛之前,你要預備定多幾個時段,因為11月至12月係佢地旺季,D位好快無哂。我地去個日正正因為咁樣要改我地嘅行程。

 

係呢個買車飛嘅地方,佢地竟然有個操流利普通話嘅職員! 因為佢先可以好順利咁買哂D飛。如果唔係,真係雞同鴨講。

 

我地第一晚住係名古屋,由機場到名古屋可以坐名鐵電車,車程都係約30分鐘,車費 870 Yen。我地到達名古屋已經係5:30 p.m,所以只可以留係名古屋駅附近周圍行下。

 

第一日: 海老どて食堂

係名古屋嘅其中一個亮點就係以下呢條超長海老,足足35cm,有我手臂咁長。呢間野係Esca 地下街內,Esca 係JR名古屋駅旁邊。

 

 

第二日: 白川鄉

去名古屋,白川鄉係必遊嘅地方。白川鄉係世界文化遺產之一,係欣賞紅葉和初雪嘅好地方。去白川鄉有兩條路線:

 

  1. 名古屋 --> (JR線) --> (濃飛巴士) 白川鄉

  2. 名古屋 --> (JR線)--> (濃飛巴士) 白川鄉

 

兩條路線所需嘅時間差唔多,都要成五個鐘。行邊條路線要睇你玩邊個地方先同埋有冇買日本JR Pass。方便大家理解,有以下總結:

 

1) 要去白川鄉方便D,有一個Pass 叫高山北陸 Pass。佢包左你好多路線 (詳情可看: http://touristpass.jp/ja/takayama_hokuriku/),但一定要留意,呢個 PaSS 係唔包名古屋 <-->金澤,所以如果你要用個 Pass 用到盡就要選擇路線: 名古屋 --> (JR線) 高山 --> (濃飛巴士) 白川鄉

2) 即使買左高山北陸 Pass,如果你唔係好多經驗,你會煩唔知點用個 Pass。以下簡單介紹步驟如下:

 

a) 你要拎住係香港買嘅Japan Rail Pass 到指定嘅JR 站換領高山北陸 Pass,個 Pass 度有寫明係邊個JR 站可以換,基本上大部份大嘅JR站都有得換,但提一提大家一換領左之後就可以倒數個Pass完結時間,留意呢個Pass 只係用五日。​

b) 當你換個左高山北陸PASS後,你已經可以自由搭指定嘅JR線,但如果要搭去白川鄉嘅巴士仲有幾個步驟。當你決定左邊日去白川鄉,你第一步要做嘅係去濃飛巴士個網站做預約 (網止: https://secure.j-bus.co.jp)。預約前要先登記做會員。當你登記做會員時,有兩項資料會令你好煩惱: 就係日本姓名和日本電話。要解決這兩個問題其實唔難,要輸入日本姓名,你只要用 Google Translate 轉換你個英文姓名即可。而日本電話只要在你嘅電話號碼前加852即可。當你登記完成後,你就可以預約巴士;預約成功後,你會收到電郵通知。最後,你就係出發當天到高山或金澤嘅濃飛巴士辦工室換巴士車飛。記住你要帶齊電郵通知嘅列印版本同埋高山北陸Pass。​

c) 如果你係影相發燒友,個人建議留兩至三個鐘係白川鄉。白川鄉巴士嘅時間可以留意呢個網址: https://www.nouhibus.co.jp/ch_h/highwaybus/shirakawago.pdf。佢D巴士要盡量預早book,因為每日去白川鄉嘅巴士唔算多,好多時兩至三個星期前已經full晒。如果你前一晚唔會係金澤或者高山留宿,而係一朝早由名古屋直接出發,其本上你只有兩班車可以選擇。以我地為例,我地就係訂唔到由高山出發去白川鄉嘅巴士,要轉由金澤入。最終每人要俾多HKD$500,因為高山北陸PASS 唔包名古屋去金澤條線。

 

我地去到白川鄉,紅葉唔算太多,但D境都好靚。有幾靚? 唔多講,有圖有真相,全部都係今次旅程拍嘅

 

 

 

 

 

係白川鄉,有兩款超好味嘅小食! 好幾間舖都賣緊,所以唔難揾到。

 

飛驒牛包

 

 

飛驒牛薯餅

 

 

 

另一件好特別嘅手信就係下面隻公仔,基本上間間舖頭都會見到佢。

 

第二日:兼六園

 

 

兼六園係另一個賞楓好出名嘅地方,你除左可以早上和下午去之外,每年都有一段時間可以夜晚入去賞夜楓,而且仲係免費開放,今年就係11月18日至12月10日,每日 5:30 p.m – 9:00 p.m。

 

去兼六園交通: 係JR 金澤站出面嘅巴士站坐6號巴士,大約15分鐘就到。

俾大家睇下我地影嘅夜楓作品啦:

 

 

去兼六園,可以同大家分享一下以下小貼士:

 

如果你係由名古屋出發,想同一日遊覽晒兼六園同埋白川鄉,基上你只可以朝早或夜晚去。夜晚去的話,時間無咩問題,但就要睇下撞唔撞到佢賞夜楓個期。至於朝早去,D時間會有D趕,因為由名古屋出發到金澤大約要兩個半鐘,你去到金澤最快都已經係10:00 a.m,如果你選擇去左兼六園先,之後再去白川鄉,會好晏先去到白川鄉,而白川鄉尾班車係5:30 p.m,所以會唔係好夠時間玩晒白川鄉。另外,呢個行程仲會無得用高山北陸Pass,因為前文已提過高山北陸Pass係唔包由名古屋 --> 金澤嘅JR 線。所以如果你時間充裕,可以考慮一下分開兩日去,第一日用高山北陸 Pass 經高山入白川鄉,然後再由白川鄉到金澤留宿,第二日先遊覽兼六園及金澤其他名勝。

 

而我地因為時間趕,同埋撞啱夜楓嘅開放時間,所以我地選擇左一早先去白川鄉玩盡佢,之後夜晚再到兼六園賞夜楓,留宿就去富山 (高山北陸 pass 包金澤-->富山 JR 高山北陸新幹線),因為方便我們之後嘅行程。

 

以上就係我地頭兩日嘅行程俾大家參考。之後第二篇有我地行程另外兩個重點: 立山黑部及黑部峽谷,亦都因為呢個兩個地方,我地先要係高山留宿。密切留意!

 

第一篇完

 

------------------------------------------------------------------------------------

溫馨提示:

旅行雖然開心,但要玩得盡興,基本上你會行無數嘅路,仲要孭住個背囊、腳架、相機成日,返到酒店有時真係會腳痛+周身痛。虎標萬金油(紅色) 係呢個時候就可以發揮佢嘅作用。佢蘊含肉桂,帶來溫熱感,有效紓緩肌肉疼痛和勞損扭傷。

 

 

Please reload

February 3, 2017

Please reload

Featured Posts

Follow us

  • Facebook - White Circle
  • YouTube - White Circle

版權所有© 2016 - 2017. 虎豹企業有限公司