塔門草原之遊

November 11, 2016

 今次介紹呢個地方塔門草原,行嘅路算容易,唔算多斜路,絕對適合一家大細去。你有時間仲可以露營,夜觀繁星。

 

塔門草原,又名弓背山坡。佢最吸引嘅地方就係嗰片位於高山嘅青綠草地。除了自然風光,在塔門草原遊客更可以享受到藍天白雲,以及無敵大海景。

 

去塔門草原,首先要坐船到塔門碼頭,有兩條路線供大家選擇:

  1. 從港鐵大學站B出口搭乘計程車至馬料水碼頭,再轉乘街渡,船程約1.5小時。

  2. 從西貢市中心搭乘94號巴士至黃石碼頭,再轉乘街渡,船程約35分鐘。

船嘅航班及價錢大家可以留意以下網址:

http://www.tapmun.hk/tb.htm

星期六、日佢地D船好易爆滿,所以大家最好預早出發,個人建議到黃石碼頭好D,因為早上航班比馬料水碼頭多一班。另外,係嗰兩個碼頭有好多快艇可以坐,係會快左好多,但留意佢地係屬於無牌經營的。

 你睇,囡囡一坐船,就超開心,哈哈。

當到達塔門碼頭後,沿以下路線即可到達,需時約30分鐘。

塔門碼頭 > 塔門海傍街 > 天后古廟 > 山頂觀海亭及大草坪

 

回程則可以沿以下路線,需時約1 小時:

山頂觀海亭及大草坪 <呂字疊石 < 漁民新村 < 塔門碼頭

 

到達塔門碼頭後,我地第一個遊覽嘅景點就係塔門海傍街,呢度有D街檔賣風味小食如蝦乾、魷魚絲等,價錢好平,臨走時可以係到買D返屋企整返兩味。

另外,提一提大家如果你想係草原放風箏,就要係呢度買,因為之後沿途係無得賣嘅。

 

大家亦可以係呢度先充饑才開始路程。有一間好出名的舖頭叫新漢記,佢地嘅塔門3寶: 椒鹽魷魚、海膽炒飯、炸墨魚丸好出名。我地就食左海膽炒飯同埋炸墨魚丸,海膽我生食就食過好多次,但炒飯就無食過,對我黎講係新野,哈。炒飯係幾有火喉,海膽幾香。至於炸墨魚丸幾彈牙,的確幾有風味又幾好食。

 額外一提,舖頭係可以帶狗入去,當日我就見到唔少大狗,怕狗嘅朋友,就要特別留意。但我個囡就一D都唔怕,仲係咁引同枱嘅牧羊狗玩添。

 

填飽個肚後,就開始我地嘅行程! 沿途見到有好多屋裝修緊,唔通係起渡假村?如果可以係到渡下假都唔錯,可以遠離煩囂。

 經過左小屋後,再過埋天后古廟,好快我地就到達左大草原。

 

我地去嗰日天色雖然唔係太好,但都可以接受,而且唔算好多人,成個草原仲有好多空間,好適合紮營。

 呢個草原因為係山上,所以都幾應風,而家呢個天氣去好舒服,而且仲好適合放風箏。

而草原嘅另一個特色就係好多牛牛,囡囡一見到佢地就係咁追住D牛仔,一D都無怯場。

 

 係草原上,D牛通常係下午時間出現,最高峰時你會發現有7-10隻牛係度食草。雖然牛牛係西貢都見到好多,但配合埋青綠草地+無敵大海景,已經係香港絕景!

 

所以呢個地方非常值得一家大細去。

----------------------------------------------------------------------

溫馨提示:

係山上面因為地方空曠,都幾應風。而且只得一個涼亭可以遮蔭,其餘地方被太陽直曬落黎都幾熱。係呢D又冷又熱嘅情況,好易凍親頭痛加流鼻水。所以盡量著D容易除嘅外套較適合。

而且蚊叮蟲咬都好平常,當然要帶備驅蚊用品。

另外,亦可以帶備我地嘅虎標萬金油(白色) 或 虎標萬金油軟膏,不但可以紓緩頭痛不適,對蚊叮蟲咬引致痕癢等不適亦有幫助。天然草本成份,大人和小朋友都啱用。

Please reload

February 3, 2017

Please reload

Featured Posts

Follow us

  • Facebook - White Circle
  • YouTube - White Circle

版權所有© 2016 - 2017. 虎豹企業有限公司