改善上交叉綜合症，必看4招即時視覺減磅！
近年經常聽到嘅「辦公室痛症」叫做「上交叉綜合症」，主要指唔同程度嘅圓肩（肩膀扭向前）、駝背、或頭向前傾嘅不良姿勢而引致肩頸痛等問題。以為依啲都市常見痛症可以忽視？貪靚嘅您要注意啦，久而久之嘅錯誤坐姿或者站姿仲會影響您嘅上半身體態，有機會令人看起嚟臃腫。想同「虎背熊腰」割蓆就要立即檢查同糾正。
-》如何檢查有沒有上交叉綜合症
要check下自己有無上交叉綜合症，唔使去搵「朕」嘅！只要影張側身相或者搵其他人幫您睇，就可以檢查到。因為上交叉綜合症患者嘅頭部及肩膊會向前或向後傾，而正確嘅上半身姿勢應以耳朵垂下穿過肩部嘅中心點連成一條直線，所以無論喺站立或坐下時，上身由脊椎至頸椎都應該係呈挺直的狀態。
上交叉綜合症如何引致頸肩痛
如果長期以不良姿勢工作，肩膊就會越往後偏而造成上交叉綜合症。當圓肩、駝背、頭向前傾嘅情況慢慢變得明顯，就會導致慢性肩頸酸痛，嚴重起上嚟會因為血管同神經受壓，引起頭痛同手臂痲痺等各種症狀！
平日拉筋 改善姿勢
想改善「虎背熊腰」，塑造良好體態就要日日努力做喇！
*以下建議只屬參考用途，因每人體質及症狀不同，如果有任何疑問，請先向醫生尋求治療方法
改善「虎背熊腰」有兩大方向：
• 改善「寒背」：可以透過多啲「挺胸收腹」，伸展胸部同收緊肩胛骨嚟幫手！
• 改善「頭耷耷」：透過頸部運動同改善體姿，就可以唔使再成日頭耷耷望地下！
1. 斜角肌伸展
做斜角肌伸展時，腰背要保持挺直，雙肩放鬆同時向後拉少少。喺伸展右邊斜角肌嘅時候，可以先將頭部向左傾，然後用左手輔助按住右邊頭部再輕輕向下拉，當感覺到右邊頸側有少許拉扯時，維持動作約15-30秒。做完右邊，記得做埋左邊，左右各重複3次。Keep住每日做可以幫助改善斜角肌緊張同消除肩頸側酸痛架！
2. 肩胛提肌伸展
做肩胛提肌伸展時先放鬆雙肩，以伸展右邊肩胛提肌為例，頭部望向左邊大約45度，用左手將頭輕輕向下按，直到頭部向左斜下方傾，同時感覺到肩胛骨至頸位置有拉扯感覺時，維持動作約15-30秒。然後左右調轉跟從以上步驟就可以伸展埋左邊嘅肩胛提肌。
3. 提升胸部
有一個瑜伽動作叫做「駱駝式」可以放鬆肩頸及伸展肩頰骨同胸部。先跪喺地下，雙膝分開約等如膊頭闊度，雙手扶住臀部上方位置，一邊呼氣，一邊抬起胸部並收緊腹部，倒頭向後，眼望天花板維持3至5個呼吸時間。如果仍有空間可以進一步伸展的話，雙手可以慢慢移到腳跟位置，然後胸部繼續往上伸展！完成後一邊吸氣並將上半身慢慢回復挺立姿態然後放鬆。
4. 胸大肌伸展
做胸大肌伸展時，先將左手按住牆邊或其他穩固實物，將左腳慢慢踏前，當感覺到胸部肌肉拉扯時，就可以維持動作15-30秒。再換右邊，左右各重複3次。
日日只要keep住做，就可以幫助改善「虎背熊腰」，回復好體態，望落個人都精神啲，自己又唔使孭住咁多痛症！做完以上運動改善姿勢，可以用埋虎標頸肩舒，輕輕搽上肩膀同頸部，然後按摩一下，更加有助紓緩痛症！